| മലയാളികള്ക്ക് കൃഷിയില് താത്പര്യം വര്ധിച്ച സമീപകാല സാഹചര്യം പരിഗണിച്ച് ജൈവകൃഷി വീട്ടുവളപ്പുകളില് പ്രചരിപ്പിക്കാന് ശ്രമങ്ങളുണ്ടാകണമെന്ന് ഗവര്ണര് പി. സദാശിവം അഭിപ്രായപ്പെട്ടു. ആകാശവാണിയുടെ 'വയലും വീടും' പരിപാടിയുടെ സുവര്ണജൂബിലി ആഘോഷങ്ങളുടെ സമാപനചടങ്ങ് നിശാഗന്ധി ഓഡിറ്റോറിയത്തില് ഉദ്ഘാടനം ചെയ്തുസംസാരിക്കുകയായിരുന്നു ഗവര്ണര്. വികസനത്തിലൂടെ സാമൂഹികമാറ്റത്തിനുള്ള ത്വരകമായി റേഡിയോ മാറിയതിന്റെ ഉത്തമ ഉദാഹരണമാണ് 'വയലും വീടും' പരിപാടി. കര്ഷകര്ക്ക് ആധികാരിക കാര്ഷിക വിജ്ഞാനം പകര്ന്നുനല്കുന്നതിനൊപ്പം അവരുടെ പ്രശ്നങ്ങള് ഉയര്ത്തിക്കാട്ടി അവര്ക്ക് വേണ്ടി സംസാരിക്കാനും ആകാശവാണി പോലുള്ള മാധ്യമങ്ങള് മുന്നോട്ടുവരണം. സാമൂഹ്യമാധ്യമങ്ങളിലടക്കം ആശയക്കുഴപ്പമുണ്ടാക്കുന്ന വിവരങ്ങള് പ്രചരിക്കുമ്പോള് ആകാശവാണിയുടെ വിശ്വാസ്യത മാറ്റമില്ലാതെ തുടരുന്നു. ഈ ആധികാരികത 'വയലും വീടും' പോലുള്ള പരിപാടികളിലും പ്രതിഫലിക്കുന്നുണ്ട്. ഗ്രാമീണ ജനതയ്ക്ക് കാര്ഷിക അറിവുകള് പകര്ന്നുനല്കി ഹരിതവിപ്ലവത്തിലൂടെ സ്വയംപര്യാപ്തരാക്കാന് ആകാശവാണിയും 'വയലും വീടും' പരിപാടിയും നല്കിയ സേവനങ്ങള് വിലപ്പെട്ടതാണ്. ഐ.ആര്-എട്ട്, ജയ തുടങ്ങിയ നെല്ലിനങ്ങളുടെ കൃഷി വ്യാപകമാകുന്നതില് അക്കാലത്ത് 'വയലും വീടും' നല്ല പങ്ക് വഹിച്ചിട്ടുണ്ട്. ഒരുഘട്ടത്തില് ഇവ 'റേഡിയോ അരി' എന്നുപോലും അറിയപ്പെട്ടു. വിദഗ്ധരും ഗവേഷകരും വകുപ്പുകളും സംഘടനകളുമായി കര്ഷകര്ക്ക് ബന്ധമുണ്ടാക്കുന്നതില് മുഖ്യഘടകമായി ഈ പരിപാടി മാറി. കൃഷിപാഠം പരിപാടിയും വിവിധ കാര്ഷിക വിഷയങ്ങളില് വിജ്ഞാനം പകര്ന്നുനല്കി. കൃഷി സംബന്ധിച്ച് ജനങ്ങളുടെ മനോഭാവം മാറ്റിയെടുക്കാന് ഇത്തരം പരിപാടികള് മുന്കൈയെടുക്കണം. മികച്ച ഉള്ളടക്കവും ആകര്ഷകമായ അവതരണവുമായി ടെലിവിഷനുമായി മത്സരിക്കാന് റേഡിയോക്ക് കഴിയും. കൃഷിയുടേയും കര്ഷകരുടേയും ഉന്നമനത്തിനായി നടത്തുന്ന പ്രവര്ത്തനങ്ങള് സാമൂഹ്യമുന്നേറ്റത്തിനും ശാക്തീകരണത്തിനും വഴിവെക്കും. കാര്ഷിക ക്വിസ് ജേതാക്കള്ക്കുള്ള സമ്മാനദാനം ഗവര്ണര് നിര്വഹിച്ചു. പ്രമുഖ കാര്ഷിക വിദഗ്ധന് ആര്. ഹേലി, ലോഗോ രൂപകല്പന ചെയ്ത സജി എണ്ണക്കാട് എന്നിവരെ ചടങ്ങില് ഗവര്ണര് ആദരിച്ചു. സംസ്ഥാനത്ത് കാര്ഷികകുതിപ്പിനാണ് സര്ക്കാര് ലക്ഷ്യമിടുന്നതെന്നും 'ഹരിതകേരളം' മിഷന്റെ പ്രധാനലക്ഷ്യമിതാണെന്നും ചടങ്ങില് അധ്യക്ഷത വഹിച്ച മുഖ്യമന്ത്രി പിണറായി വിജയന് പറഞ്ഞു. ജൈവകൃഷി ശക്തിപ്പെടണം. പച്ചക്കറി, പഴവര്ഗങ്ങള് തുടങ്ങിയവയുടെ സ്വയംപര്യാപ്തയ്ക്കാണ് സര്ക്കാര് ശ്രമിക്കുന്നത്. കാര്ഷികരംഗത്തെ വികസനത്തിനൊപ്പം കര്ഷകരുടെ വരുമാനം വര്ധിക്കണം. ഇതിനായി നൂതന സാങ്കേതികവിദ്യകളുടേയും യന്ത്രങ്ങളുടെയും സഹായം തേടും. സാധാരണക്കാരുടെ മാധ്യമം എന്ന നിലയില് റേഡിയോയിലൂടെയുള്ള 'വയലും വീടും' പരിപാടിക്ക് തുടങ്ങിയ കാലത്തുള്ളതുപോലെ ഇപ്പോഴും ജനങ്ങള് കാതോര്ത്തിരിക്കുന്നു എന്നതാണ് വിജയമെന്നും അദ്ദേഹം പറഞ്ഞു. ചടങ്ങില് വനം-മൃഗസംരക്ഷണ വകുപ്പ് മന്ത്രി കെ. രാജു മുഖ്യപ്രഭാഷണം നടത്തി. എം.എല്.എമാരായ ഒ. രാജഗോപാല്, കെ. മുരളീധരന് എന്നിവര് ആശംസകള് നേര്ന്നു. ആകാശവാണി തിരുവനന്തപുരം സ്റ്റേഷന് ഡയറക്ടര് ആര്.സി. ഗോപാല് സ്വാഗതവും അനന്തപുരി എഫ്.എം സ്റ്റേഷന് ഡയറക്ടര് ആര്. വിമലസേനന് നായര് നന്ദിയും പറഞ്ഞു. തുടര്ന്ന് ആകാശവാണി കുട്ടികളുടെ ഗായകസംഘം അവതരിപ്പിച്ച 'ഘനശ്യാമം' ലളിതഗാനമേള അരങ്ങേറി |
അഭിപ്രായങ്ങള്
ഒരു അഭിപ്രായം പോസ്റ്റ് ചെയ്യൂ
Thank You...Visit again...
thank you for visiting this site..