അകാലത്തിൽ പൊലിഞ്ഞപ്രിയ കൂട്ടുക്കാരനെ കുറിച്ച്കുറിപ്പെഴുതി ടിനി ടോം

മാധ്യമ ലോകത്തെ ഞെട്ടിക്കുന്ന ലൈവ് ഷോയുമായി നികേഷ് കുമാര്‍ തിരിച്ചുവരുന്നു

കൊച്ചി: മാധ്യമ ലോകത്തെ ഞെട്ടിക്കുന്ന ലൈവ് ഷോയുമായി എം.വി. നികേഷ് കുമാര്‍ തിരിച്ചുവരുന്നു. റിപ്പോര്‍ട്ടര്‍ ചാനലില്‍ ഒരു മണിക്കൂര്‍ നീളുന്ന ലൈവ് ഷോയുമായിട്ടാണ് നികേഷ് കുമാറിന്റെ തിരിച്ചുവരവ്. നികേഷ് കുമാര്‍ ലൈവ് ഷോ എന്നാണ് പോഗ്രാമിന്റെ പേരെന്നാണ് ലഭിക്കുന്ന വിവരം. കേരളത്തിലെ വിവിധ നഗരങ്ങളില്‍ നിന്നുമായിരിക്കും പരിപാടിയുടെ തല്‍സമയ സംപ്രേക്ഷണം നടക്കുക. വിവിധ സ്ഥലങ്ങളിലെ ജനകീയ വിഷയങ്ങളായിക്കും ഷോയില്‍ അവതരിപ്പിക്കുകയെന്നും സൂചനയുണ്ട്. ജനകീയ വിഷയങ്ങള്‍ ഏറ്റെടുത്ത് സാധാരണക്കാരിലേക്ക് ഇറങ്ങുന്ന മാധ്യമപ്രവര്‍ത്തനത്തിന്റെ പുതിയ രൂപവുമായാണ് നികേഷ് കുമാറിന്റെ രണ്ടാം വരവ്. ഈ മാസം നാലിന് ദുബായ്‌യില്‍ നടക്കുന്ന റിപ്പോര്‍ട്ടര്‍ ചാനലിന്റെ ബിസിനസ് അവാര്‍ഡ് നിശയില്‍ പരിപാടിയുടെ പ്രഖ്യാപനം നടക്കും.

കഴിഞ്ഞ നിയമസഭ തെരഞ്ഞെടുപ്പില്‍ അഴീക്കോട് മണ്ഡലത്തില്‍ മുസ്ലീം ലീഗിലെ കെ.എം. ഷാജിയോട് തോറ്റെങ്കിലും കേരളം ഉറ്റുനോക്കിയ മത്സരം കാഴ്ചവയ്ക്കാന്‍ നികേഷ് കുമാറിനു കഴിഞ്ഞു. ഫെയ്‌സ്ബുക്കിലൂടെ പുതുമയുള്ള തെരഞ്ഞെടുപ്പ് പ്രചരണവും നികേഷ് അവതരിപ്പിച്ചു. മണ്ഡലത്തിലെ ഒരു കിണറ്റിലിറങ്ങി നികേഷ് വെള്ളമെടുത്തതും ഇതിന് കെ.എം. ഷാജി നല്‍കിയ മറുപടിയും വലിയ ചര്‍ച്ചയായിരുന്നു. തെരഞ്ഞെടുപ്പില്‍ മത്സരിക്കാനായി മാധ്യമ പ്രവര്‍ത്തനത്തിന് ചെറിയ ഇടവേള നല്‍കിയെങ്കിലും നികേഷ് കുമാര്‍ ഇപ്പോഴും റിപ്പോര്‍ട്ടര്‍ ചാനലിന്റെ പ്രവര്‍ത്തനങ്ങളില്‍ സജീവമാണ്. ദിവസവും ഓഫിസിലെത്തുന്ന അദ്ദേഹം വാര്‍ത്തകള്‍ തയാറാക്കുന്നതിലും പോഗ്രാമുകള്‍ ആസൂത്രണം ചെയ്യാനും മാര്‍ക്കറ്റിങ് രംഗത്തും സജീവമായി ഇടപെടുന്നു. ക്യാമറയ്ക്ക് മുന്നില്‍ പ്രത്യക്ഷപ്പെടുന്നില്ലെന്നുമാത്രം.

കേരളത്തിലെ ന്യൂസ് ചാനല്‍ രംഗത്ത് വിപ്ലവം സൃഷ്ടിച്ച മാധ്യമ പ്രവര്‍ത്തകനാണ് എം.വി. നികേഷ് കുമാര്‍. വാര്‍ത്താ അവതരണത്തിലെ സ്ഥിരം കെട്ടുപാടുകള്‍ അവസാനിപ്പിച്ച് പുതിയൊരു മേഖല കണ്ടെത്താന്‍ നികേഷ് കുമാറിനു കഴിഞ്ഞു. ഇന്ത്യാവിഷന്‍ ചാനലിലൂടെ അദ്ദേഹം കൊണ്ടുവന്ന മാറ്റങ്ങള്‍ മലയാള ദൃശ്യമാധ്യമ ചരിത്രത്തിലെ സുവര്‍ണ ഏടുകളാണ്. ഇന്ത്യാവിഷനില്‍ നിന്നു രാജിവച്ച ശേഷം ആരംഭിച്ച റിപ്പോര്‍ട്ടര്‍ ചാനലിന് പക്ഷെ വേണ്ടത്ര ശ്രദ്ധ നേടാനായില്ല. പുതിയ ലൈവ് ഷോയിലൂടെ റിപ്പോര്‍ട്ടര്‍ ചാനലിന്റെ ജനപ്രീതിയും ഉയര്‍ത്താമെന്നാണ് നികേഷിന്റെ കണക്കുകൂട്ടല്‍.