ലോ അക്കാഡമിയില്‍ സംഘര്‍ഷാവസ്ഥ

അക്കാഡമിയിലെ വിദ്യാര്‍ത്ഥി സമരം ഒത്തു തീര്‍പ്പാക്കണമെന്ന് ആവശ്യപ്പെട്ട് മരത്തിനു മുകളില്‍ കയറി ആത്മഹത്യാഭീഷണി മുഴക്കിയ വിദ്യാര്‍ത്ഥി മരത്തിനു മുകളില്‍ തന്നെ തുടരുകയാണ്. എ.ബിവി.പി പ്രവര്‍ത്തകനായ ഷിമിത്താണ് ആത്മഹത്യാഭീഷണി മുഴക്കുന്നത്. നാലാം വര്‍ഷ വിദ്യാര്‍ത്ഥിയായ ഷിമിത്തിന് മനഃപൂര്‍വ്വം മാര്‍ക്ക് കുറഞ്ഞതിനാല്‍ ഒരു വര്‍ഷം നഷ്ടപ്പെട്ടു എന്ന പരാതിയുണ്ട്. കെ.എസ്.യു, എ.ബി.വി.പി, എസ്.എഫ്.ഐ എന്നീ സംഘടനകളിലെ ഓരോ വിദ്യാര്‍ത്ഥികളെ താന്‍ വഴിവിട്ടു സഹായിച്ചിരുന്നതായി കഴിഞ്ഞ ദിവസം ലക്ഷ്മിനായര്‍ ഒരു പത്രത്തിനു നല്‍കിയ അഭിമുഖത്തില്‍ പറഞ്ഞിരുന്നു. വഴിവിട്ടു സഹായിച്ചു എന്ന് ലക്ഷ്മിനായര്‍ പറയുന്ന 3 വിദ്യാര്‍ത്ഥികളില്‍ ഒരാളാണ് ഷിമിത്. ആത്മഹത്യാഭീഷണിയെത്തുടര്‍ന്ന് സംഭവസ്ഥലത്തെത്തിയ സബ് കളക്ടര്‍ ദിവ്യ.എസ്.അയ്യര്‍ വിദ്യാര്‍ത്ഥികളുമായി ചര്‍ച്ച ചെയ്തതിനുശേഷം തിരികെപ്പോയി. നാളെ നടക്കുന്ന മന്ത്രിസഭാ യോഗത്തില്‍ ലോ അക്കാഡമി പ്രശ്‌നം ഗൗരവത്തില്‍ ചര്‍ച്ച ചെയ്ത് തീരുമാനമെടുക്കുക, ദളിത് അതിക്രമ നിരോധന നിയമം അനുസരിച്ച് കേസെടുക്കുക, ലക്ഷ്മിനായരുടെ പാസ്‌പോര്‍ട്ട് കണ്ടുകെട്ടുക എന്നീ ആവശ്യങ്ങളാണ് വിദ്യാര്‍ത്ഥികള്‍ ഉന്നയിച്ചത്. കളക്ടറുമായി ചര്‍ച്ച ചെയ്ത് വരാമെന്ന് പറഞ്ഞ് സബ് കളക്ടര്‍ തിരികെപ്പോയിരിക്കുകയാണ്.